Udir set to trekkdatoar i året: ein på hausten og ein på våren. På desse datoane skal alle eksamenar kunngjerast, både skriftlege, munnlege, munnleg-praktiske og evt. praktiske. 

Sjå https://eksamensplan.udir.no/ for oppdatert info om relevante eksamensdatoar til ei kvar tid. 

På munnleg eksamen har du ein 24 timars førebuingsdel. Dette er ein obligatorisk skuledag dagen før eksamen, der alle hjelpemiddel er tillatne. Du må møte på skulen, der du har rett på eit pedagogisk tilbod med rettleiing frå ein lærar.

I starten av førebuingsdelen skal du trekke eit tema eller ei problemstilling som du skal gå gjennom på den munnlege eksamenen. Samstundes skal du få vite kva kompetansemål som er knytt til temaet/problemstillinga. Du har òg rett på å vite vurderingskriteria for faget.

Du bruker førebuingstida til å førebu deg til utspørjinga, førebu den eventuelle presentasjonen du skal ha under eksamen og/eller å skrive notat som du har med deg som hjelpemiddel på eksamen. 

Under førebuingsdelen kan du samarbeide med andre elevar, men hugs at du er åleine under sjølve eksamenen.

Førebuingsdelen har ikkje nokon innverknad på eksamenskarakteren.

Det einaste hjelpemiddelet som er tillete er dine eigne notat som du laga på førebuingsdelen, inkludert det du treng for å gjennomføre ein presentasjon av temaet/problemstillinga. Det kan vere digitale hjelpemiddel eller andre verktøy.

Notata dine har ikkje nokon innverknad på eksamenskarakteren.

Munnleg eksamen er todelt, og varer i inntil 30 minutt.

I første del av eksamenen kan du velje å halde ein presentasjon med utgangspunkt i tema/problemstilling og kompetansemåla frå førebuingsdelen. Denne skal ikkje utgjere meir enn ein tredjedel av eksamen, altså maks 10 min.

Resten av eksamen vil du få utdjupande spørsmål knytt til tema/problemstilling, men også frå faget i heilskap. 

Særskilt for munnleg-praktisk eksamen: 

Munnleg-praktisk eksamen er tredelt og varer i inntil 45 minutt. Dei to første delene er like som i vanleg munnleg eksamen.

I tillegg skal denne typen eksamenar ha eit praktisk innslag. Det betyr at du anten utfører ei praktisk øving, forklarer kva som skjer i ei praktisk øving eller eventuelt simulerer ei praktisk øving. Du vil få beskjed om kva du skal gjere.

Det kan hende du får lyttetekstar under ein munnleg eksamen i engelsk eller andre framandspråk. Desse kan du få som ein del av førebuingsmaterialet, eller under sjølve eksamenen.

Du skal vurderast på grunnlag av den kompetansen som du viser på sjølve eksamenen. Førebuingsdelen er ikkje ein del av dette vurderingsgrunnlaget.

Du skal få høve til å vise kompetansen din i så stor del av faget som mogleg ut frå eksamensforma, så sensorane må stille spørsmål som gir deg høve til å vise breiast mogleg kompetanse i faget. Sensorane skal leite etter den kompetansen du har, og ikkje etter det du ikkje kan. 

Vurderingskriteria skal vere klare for deg frå du får trekkoppgåva, og det er desse sensorane må gå ut frå i karakterfastsettinga. 

Du skal få karakteren umiddelbart etter eksamen er ferdig. 

Statsforvaltaren er klageinstans for klager på munnleg og munnleg-praktisk eksamen.

Klagefristen er 10 dagar etter at du er blitt kjend med eksamensresultatet.

Du kan kun klage på formelle feil som har hatt noko å seie for eksamensresultatet. 

Viss du får medhald, blir eksamenskarakteren annullert. Du kan velje om du vil gå opp til ny eksamen med ny sensor. Viss eksamen er i eit trekkfag, skal fag trekkast på nytt.

Du finn meir om dette med eksamensklager ved å trykke på knappen under. 

Klage på karakter 

Retningslinjer for munnleg og munnleg-praktisk eksamen