Du får vite kva fag du skal opp til munnleg eksamen i 48 timar før eksamenen startar.

Laurdagar, søndagar, høgtidsdagar og heilagdagar vert ikkje rekna med.

På munnleg eksamen har du ein 24 timars førebuingsdel. Dette er ein obligatorisk skuledag dagen før eksamen, der alle hjelpemiddel er tillatne. Du må møte på skulen, der du har rett på eit pedagogisk tilbod med rettleiing frå ein lærar.

I starten av førebuingsdelen skal du trekke eit tema eller ei problemstilling som du skal gå gjennom på den munnlege eksamenen. Samstundes skal du få vite kva kompetansemål som er knytta til temaet/problemstillinga. Du har og rett på å vite vurderingskriteria for faget.

Du brukar førebuingstida til å førebu presentasjonen du skal ha under eksamen, og å skrive notat som du har med deg som hjelpemiddel på eksamen.

Under førebuingsdelen kan du samarbeide med andre elevar, men hugs du er åleine under sjølve eksamenen.

Førebuingsdelen har ikkje nokon innverknad på eksamenskarakteren.

Det einaste hjelpemiddelet som er tillete er dine eigne notat som du laga på førebuingsdelen, inkludert det du treng for å gjennomføre ein presentasjon av temaet/problemstillinga. Det kan vere digitale hjelpemiddel eller andre verktøy.

Notata dine har ikkje nokon innverknad på eksamenskarakteren.

Munnleg eksamen er todelt, og varer i inntil 30 minutt.

Første del av eksamenen, inntil 10 minutt, skal du helde ein presentasjon med utgangspunkt i tema/problemstilling og kompetansemåla frå førebuingsdelen. Det er denne som dannar utgangspunktet for resten av eksamineringa.

Resten av eksamen, andre del, vil du få utdjupande spørsmål knytta til det du har presentert. I tillegg må du kunne vise kompetanse innanfor andre deler av læreplanen som er relevante i forhold til tema/problemstillinga.

Særskilt for munnleg-praktisk eksamen: 

Munnleg-praktisk eksamen er tredelt og varer i inntil 45 minutt. Dei to første delene er like som i vanleg munnleg eksamen.

Tredje del av eksamen skal ha eit praktisk innslag. Det betyr at du anten utfører ei praktisk øving eller forklarer kva som skjer i ei praktisk øving, eventuelt simulerer ei praktisk øving. Du vil få beskjed om kva du skal gjere.

Kan hende får du lyttetekstar under ein munnleg eksamen i engelsk eller andre framandspråk. Desse kan du få som ein del av førebuingsmaterialet, eller under sjølve eksamenen.

Du skal vurderast på grunnlag av den kompetansen som du viser på sjølve eksamenen.

Presentasjonen er utgangspunkt for eksamineringa og skal ikkje vurderast isolert sett, men i tilknytning til utdjupingsspørsmål/samtale. I tillegg skal kompetansen du viser i andre deler av læreplanen, som er relevante i forhold til tema/problemstilling, vurderast.

Den som vurderer deg skal ikkje leite etter den kompetansen du ikkje har.