Med si plassering i enden av ein fjord, omkransa av fjell, er det mange moglegheiter for turar og friluftsliv i Sauda.

Vinterstid kan du ta turen til Sauda Skisenter i Svandalen – deler av året går det skibuss direkte til trekket. I tillegg arrangerer skulen gratis transport til skisenteret for sine elevar. Rundt om i Saudafjella er det og andre fine turterreng, både merka og umerka. Likar du å gå på ski og snowboard kan for øvrig utdanningsprogrammet idrettsfag med park- og frikøyring vere noko for deg.

Frå du er 16 år kan du vere med som aspirant i Sauda Røde Kors Hjelpekorps, som mellom anna hjelper til når det er personar som er sakna, ved ulukker, kriser og naturkatastrofar. På nettsidene til Røde Kors kan du få meir informasjon om kva Røde Kors Hjelpekorps arbeider med.

Du kan og vere med samle inn og sende ut klede og utstyr til trengande i Romania, gjennom Romania Aid.

Er du oppteken av kvinner sine rettigheiter, kan du vurdere å verte med i Sauda og omegn Zontaklubb, eit lokallag i Zonta Norge. Sauda sanitetsforening, eit lokallag i Norske Kvinners Sanitetsforening, arbeider og med kvinner sine rettigheiter, i tillegg til å arbeide for trygg og inkluderande oppvekst og lokalsamfunn.

Skulle dagane verte tunge og grå, kan Mental Helse Sauda vere til hjelp, som mellom anna har ein eigen møteplass, treningstilbod og diverse aktivitetar. Organisasjonen er ein del av Mental Helse, som arbeider for å førebygge psykiske helseplager.

Vil du ha ein jobb der du verkeleg gjer ein forskjell for andre, tilbyr skulen Helse- og oppvekstfag – samt Vg2 Ambulansefag.

Er du interessert i å lage og oppleve kunst, kan Sauda kunstlag vere noko for deg. For deg som likar å fotografere har du Sauda Fotoklubb, som har møte ein gong i månaden der ein viser fram og diskuterer bilete og teknikk. Dersom du er meir interessert i handarbeid og husflid, kan du verte med i Sauda Husflidslag.

Har du lyst til å lære deg å spele musikk, synge eller danse, har Sauda Kulturskule fleire forskjellige tilbod. Å spele instrument får du og gjere i Sauda Musikkkorps, som speler variert musikk, og låner ut instrument til medlemma.

Føler du for å synge ut i staden, kan du verte med i kora Trøkk eller Sonor. Trøkk er eit rytmisk kor som arbeider med eitt prosjekt av gongen, som endar i ein konsert. Ein melder seg i utgangspunktet på det enkelte prosjektet. Sonor er eit blandakor som øver jamnt på fast repetoar og nye songar, som vert presentert i mindre og større konsertar. Du kan og kombinere song og skodespel i Sauda revy og teaterlag.

På skulen si hovudavdeling finn du og eit lydisolert musikkrom med forskjellige instrument og utstyr, som du kan nytte til å øve på song og musikk. Kanskje vil du prøve å starte ditt eige band?

Sauda har og fleire museum med glimt inn i historia til staden. Det mest kjende er kanskje sinkgruvene i Almannajuvet, som var i drift på 1880-talet. Der kan ein få ei omvisning på området, samt ein tur inn i ei av gruvene. Museumsbygga er designa av Peter Zumthor.

På Jonegarden på Hustveit og i Tveit-tunet kan du få sjå korleis livet arta seg i det gamle bondesamfunnet. Er du meir interessert i historia til smelteverket og industrien, er kanskje Industriarbeidarmuseet og Åbøbyen av interesse.

Ca. 10 minutts gange frå skulen ligg Sauda sentrum, der du finn mange ulike butikkar og kafear.

I sentrum finn du og bibliotek og kino. Underhaldning og arrangement vert og ofte sett opp i Folkets Hus.

Du kan finne ei oversikt overt kommande arrangement i Portal Sauda sin arrangementskalender og Sauda Kultur si oversikt over kino- og kulturprogrammet.

Kvart år i slutten av mai vert og Saudadagane arrangert. Dei byr på mellom anna utekonsertar, salgsbodar og tilbod, veteranbilprosesjon, andeløp og sykkelritt.

I tillegg til dei lokale moglegheitene er både Stavanger og Haugesund ca. to timars reising vekke. Det går offentleg transport til begge stader, så du kan lene deg tilbake med musikk på øyra eller diskutere med vennene dine og nyte turen.

Sauda idrettslag tilbyr rundt ti ulike aktivitetar. Laget har og ein eigen stadion med kunstgras og flombelysning, som takka vere spillvarme er snøfri heile året. Det er og andre klubbar og lag som tilbyr forskjellige idrettsaktivitetar, mellom anna turn, karate, klatring og orientering.

Føretrekk du livet på to hjul kan Sauda Sykkelklubb vere tingen. Du kan og vere med på det årlege sykkelrittet frå Haugesund til Sauda, som går av stabelen under Saudadagane. Du finn og ein pumptrack like ved stadion, samt ein skatepark litt lenger mot elva.

Trene kan du og gjere på Frisk og Rask Treningssenter. I tillegg kan du nokre dagar nytte gymsalen i Saudahallen på kveldstid – då er det og lærar til stades.

Er du glad i å svømme kan du ta turen innom Saudahallen, ein svømmehall midt i sentrum av Sauda som har både inne- og utebasseng.

Dersom du ønsker endå meir fart kan du prøve deg på Sauda Motocrossbane med Sauda Motorsport Klubb, eller ta eit kurs i elvekajakk.

Når det gjeld skyting har du moglegheita både i Sauda Skytterlag og Sauda Pistolklubb.

Sauda kan og tilby ulike former for golf – både den «tradisjonelle» sorten, minigolf og diskgolf. Sauda Golfklubb finn du tre kilometer utanfor sentrum, i Saudasjøen. Sauda minigolf har derimot ein 18 hols bane midt i sentrum, ikkje langt frå skulen sin elevbustad. Sauda Diskgolf på si side finn du oppe i Svandalen, ved Sauda Skisenter. Skulen har og ein eigen golfsimulator nede i kjellaren som du kan øve deg i.

Hovlandsnuten er ein topp som ligg 931 meter over havet, som kan nås til fots frå Saudasjøen. Kvart år vert motbakkeløpet Hovlandsnuten Opp arrangert – der kan du prøve deg i konkurranse mot andre, med ekstra tyngde på ryggen eller berre vere med i mosjonsklassen og få ein fin tur.

For deg som er glad i sport og idrett har skulen mellom anna Idrettsfag med Villmarksliv, Idrettsfag med park- og frikøyring og ToppVolley Norge å by på.