Ta imot plassen
For å ta imot plassen må du:
- Svare elektronisk på søkesida Vigo. Hugs svarfrist.
- Møte opp på skulen første skuledag, onsdag 16. august klokka 08:10. Dei som skal gå på skulen sine avdelingar i Sauda møter på skulen sin avdeling på Lofthus, Griegsgate 40.
Dei som skal gå på ToppVolley Norge møter på skulen si avdeling på Sand til same tid.
Merk at dette ikkje gjeld elevar som byrjar på Vg4 Påbygg. Informasjon om oppmøte der finn du lenger nede på sida. Læringar som skal gå på 19 vekers kurset for yrkessjåførar vil også få eigen informasjon.
OBS: Inntaksforskrifta krev at elevar må møte på skulen første skuledag av skuleåret. Dei som utan godkjend grunn ikkje møter opp første skuledag, mister skuleplassen. Ved sjukdom pliktar eleven å melde frå til skulen snarast mogleg og seinast innan oppmøtetidspunktet den første skuledagen. Forholdet må dokumenterast med legemelding.
Ved skulestart/informasjonsmøte
Dersom du ønsker ei omvising på avdelingane i Sauda før skulestart, kan du møte opp tysdag 15. august klokka 17:00 - 19:00 i Griegsgate 40. Du har fleire måtar å komme deg til Sauda og Sand på.
Læremiddel
Du får tilbod om å kjøpe datamaskin gjennom fylkeskommunen. Sjå fylket sine sider om det, og skulen sine anbefalingar. Merk at elevar på elektro- og datateknologi og teknologi- og industrifag ikkje kan nytte Mac, og at enkelte andre studieretningar og anbefalar bruk av Windows.
Fagbøker får du låne ved skulen sitt bibliotek. Merk at du vil vere økonomisk ansvarleg for bøkene du får låne, sjå reglementet for lån av lærebøker for meir informasjon.
Lån og stipend
Lån/stipend må søkast elektronisk, sjå www.lanekassen.no.
Hybel
Skulen kan tilby informasjon om hyblar til leige i Sauda. Du kan kontakte skulen, eller sjå skulen si oversikt over hyblar for elevar. Der ligg det mellom anna informasjon om Campus Sauda, liste over private utleigarar og informasjon om kva skulen meiner er viktige ting å sjå etter når du skal velje privat hybel.
I lokalavisa Ryfylke kan du og annonsera eller finne hybelannonsar. Det ligg mange leigebustader tilgjengeleg på facebookgruppa «Ønskes solgt, kjøpes, gis bort SAUDA SAND SULDAL omegn»
Ta gjerne turen innom for ein prat i opningstida. Hovudskulen vil vere open på dagtid, med unntak av dei tre siste vekene i juli, veke 28, 29 og 30. Sentralbordet er stengt i same tidsrom.
Skulen si heimeside
Du finn alltid oppdatert informasjon på heimesida vår. Me oppmodar elevar og føresette til å nytte denne aktivt i perioden fram mot skulestart og i skulestartperioden. Her finn du informasjon om mellom anna fagtilbod, skulerute, pc-ordning, skyssordning, læremiddel, personalinformasjon og anna aktuell informasjon.
Brukarkonto
Når det nærmar seg skulestart vil du få tilsendt ein SMS med informasjon om korleis du opprettar ein brukar på skulen sine system. Det inkluderer å godkjenne reglene for bruk av IT og reglene for lån av lærebøker.
Når du har gjennomført prosedyren som er beskrive der, kan du logge deg på It’s Learning på adressa itslearning.rogfk.no. Du får og tilgang til o365.rogfk.no, der du finn til kontorprogramvare og skylagring og kan laste ned og installere Office.
Etter 15. august kan du og logge deg på Visma der du får ei oversikt over informasjonen me har om deg, inkludert karakterer og fråvær.
Informasjon for spesifikke utdanningstilbod
Nokre utdanningstilbod har meir informasjon til deg som ny elev. Dersom du skal byrje på eit av utdanningsprogramma under, bør du passe på å lese den.
Me vil med dette ønska deg velkommen til ambulansefag ved Sauda vidaregåande skule, skuleåret 2023/ 2024
INFORMASJONSMØTE
Dei fleste av elevane våre kjem frå andre kommunar enn Sauda. Det gjer det naturlegvis vanskeleg å stilla på foreldremøte på vekedagar. Av erfaring veit me at mange føresette følgjer elevane til hybelen før skulestart. Tysdag 15. august klokka 17.00 blir det foreldremøte med informasjon og omvising. Kontaktlærar vil informera om skuleåret og undervisinga. Det er viktig for oss med eit godt skule – heim samarbeid, og håpar difor at føresette kan stilla denne dagen.
VAKSINE
Me tilrår på det sterkaste at du vaksinerer deg mot Hepatitt A og B. Du må kjøpa vaksinen sjølv, men ho kan bli sett gratis på skulen av autorisert helsepersonell i samråd med lokalt legekontor. For å få vaksinen må du skaffa deg resept på TWINRIX, REIT 2 før skulestart. Dette må ein til fastlegen for å få. Vaksina vert sett tre gonger i løpet av skuleåret. Du må henta ut og betala ei vaksine på apotek for kvar gong.
KLASSETUR
Me har som tradisjon å starta skuleåret med ein klassetur til fjells. Målet med turen er å bli godt kjende med kvarandre og legga eit godt, sosialt grunnlag for resten av året. Me skal bu på hytte og legg opp til fotturar og undervising utandørs.
Du vil trenga følgjande utstyr:
- Ryggsekk
- Gode sko
- Regntøy
- Sovepose
- Varme klede
- Ull undertøy
- Handkle/toalettsaker
- Sko til bruk inne
FYSISKE KRAV
Det er ingen fysiske krav for å koma inn på Vg2 ambulansefag. Men helseføretaka gjennomfører testar i samband med opptak til læreplass. Det er viktig at du er førebudd til desse testane. Difor har skulen ekstra fokus på trening av fysisk uthald og styrke. I tillegg er fysiske testar ein del av undervisinga gjennom heile skuleåret. Me oppfordrar alle til regelmessig trening gjennom sommaren og skoleåret.
Mvh
Kjersti Brekke, kontaktlærar.
Mobil 92403429.
Oppstartssamling
Vi startar opp med ei fysisk samling torsdag 17. august klokka 10:00–14:00 på Folkets Hus i Stavanger. Hensikta med ei slik felles oppstart er at du skal få møte lærarar og medelevar og verte litt kjent med nokre arbeidsmåtar, ressursar og verktøy me nyttar i dei ulike faga. I tillegg vil du få teknisk hjelp til registrering og installasjon av programvare.
Ta med deg mobiltelefon og berbar datamaskin denne dagen. Det er då me vil nytte dagen til å presentere våre nettbaserte kommunikasjonsarenaer, som du som elev i 4PÅB vil få undervisning og tett oppfølging på gjennom året.
På samlinga vert det enkel servering (kaffe, te, frukt), men ikkje mat – det må du sørge for sjølv.
Det er viktig at du gir beskjed dersom du ikkje kan delta på oppstartssamlinga. Om du ikkje møter – og heller ikkje har gitt beskjed om at du ikkje kjem – risikerer du å miste skuleplassen. Meld frå til sindre.nordengen@skole.rogfk.no på førehand om du ikkje kan komme.
Informasjon om påbygging på nett
Du har søkt dette påbyggingstilbodet fordi du manglar fellesfag som krevst for å få generell studiekompetanse. Vårt fagtilbod består av norsk (10 timar per veke), matematikk (5 timar per veke), naturfag (3 timar per veke) og historie (5 timar per veke). Til saman utgjer det 23 timar per veke.
Mange av våre elevar kombinerer skule med fast jobb. Sidan vårt tilbod er fleksibelt med tanke på når og kor du arbeider med faga, lar det seg kombinere.
Det aller meste av undervisninga vil skje via nett. Informasjon om undervisningsopplegg og vurderingssituasjonar som krev fysisk oppmøte til bestemte tidspunkt vil verte gitt god tid i førevegen, slik at du kan planlegge kombinasjonen av skule, jobb og og andre forpliktelsar.
Me følger «gratisprinsippet» når det gjeld undervisningsmateriell, og nyttar derfor digitale læremiddel. Ingen fag er basert på innkjøp av skulebøker.
Du må stille med datamaskin med webkamera sjølv. Me anbefalar ei bærbar maskin med Windows eller ein Mac, sidan det er mest praktisk når du for eksempel skal avlegge eksamenar. Nødvendig programvare (som Microsoft Office-pakken) vil du som elev hjå oss få laste ned og installere utan kostnadar.
Kontakt
Sindre Nordengen
Kontaktlærar
Epost: sindre.nordengen@skole.rogfk.no
Me ønsker deg velkommen som elev ved Sauda vidaregåande skule.